12.06.20
Opið fyrir umsóknir
Sequences leitar að sýningarstjóra/sýningarteymi fyrir Sequences X
Stjórn Sequences real time art festival leitar að sýningarstjóra eða sýningarteymi sem mun vera í forsvari fyrir næstu útgáfu hátíðarinnar, Sequences X sem haldin verður í október 2021.
Sequences real time art festival er listamannarekin myndlistarhátíð sem haldin er annað hvert ár í Reykjavík, með sérstaka áherslu á verk í rauntíma og tímatengda miðla. Frá upphafi hefur verið lagt upp með að á hátíðinni ríki andi frumkvæðis, tilrauna og áræðni. Stofnaðilar og ábyrgðaraðilar Sequences eru Kling & Bang (st. 2003), Nýlistasafnið (st. 1978) og Kynningarmiðstöð íslenskrar myndlistar. Sequences er rekin án hagnaðarsjónarmiða.
Við leitum að sýningarstjóra eða sýningarteymi sem getur glætt hátíðina nýju ljósi og um leið litið til sögu hátíðarinnar sem listamannarekið frumkvæði með áherslu á tímatengda miðla. Sýningarstjórinn/teymið mun hafa yfirumsjón með öllu sem kemur að skipulagningu hátíðarinnar, allt frá hugmyndaramma og þema Sequences X og vali á listamönnum til fjáröflunar, framkvæmdar og lokaskýrslugerðar. Stjórn Sequences mun vera sýningarstjóra/teyminu innan handar á meðan á ferlinu stendur.
Verkefni sem sýningarstjóri/teymið mun vinna að eru meðal annars:
- Hugmyndavinna, þema, val á listamönnum og dagskrá hátíðar
- Fjáröflun og fjármálastjórnun
- Samskipti við listamenn og aðra þátttakendur
- Ritstjórn sýningarskrár
- Skipulag við uppsetningu og niðurtöku sýninga og viðburða
- Samskipti við styrktaraðila og aðra samstarfsaðila
- Miðlun hátíðar og samskipti við fjölmiðla
- Niðurtaka og lokaskýrslur
Við leitum að aðila/um með sterka listræna sýn og reynslu af skipulagi menningarviðburða. Sequences X mun fara fram í október 2021, en nánari dagsetningar verða ákveðnar í samstarfi við þann sýningarstjóra eða það teymi sem verður fyrir valinu. Hátíðin mun spanna 10 daga (2 helgar, 5 virka daga) en sýningar hátíðarinnar geta varað lengur, í samráði við sýningarstaði. Fastir sýningarstaðir hátíðarinnar eru Kling & Bang og Nýlistasafnið, og hefð er fyrir því að hátíðin fari einnig fram í öðrum listamannareknum rýmum í Reykjavík.
Umsóknarferli
Umsókn á að innihalda greinagóða lýsingu á hugmynd (1bls), ferilskrá umsækjanda ásamt tillögu að tíma- og fjárhagsáætlun. Skjalið má ekki vera meira en 2 GB.
Umsóknir sendist sem eitt sameinað pdf skjal á sequences@sequences.is fyrir miðnætti 3. ágúst 2020. Allar fyrirspurnir sendist á sama netfang og öllum spurningum verður svarað eins fljótt og auðið er.
Stjórn Sequences fer yfir innsendar umsóknir, og öllum umsóknum verður svarað eigi síður en 3. september 2020. Fyllsta trúnaðar verður gætt og stjórn Sequences áskilur sér rétt til að leita til annarra en umsækjenda.
30.1.20
Sequences fagnar þriggja ára samstarfssamningi við Reykjavíkurborg
Frá opnun á verkinu Dagrenning, að eilífu, v.2.0, eftir Ragnar Helga Ólafsson, sem sett var upp í eilitlu rými við höfnina í tilefni af 10 ára afmæli Sequences 2016. Verkið var öllum opið allan sólarhringinn í heilt ár.
Reykjavíkurborg hefur tilkynnt um styrkveitingar til menningarstarfsemi borgarinnar og fögnum við áframhaldandi samstarfi við Reykjavíkurborg næstu þrjú árin. Stuðningur borgarinnar er Sequences mikilvægur og gerir ábyrgðaraðilum hennar kleift að gera lengritíma áætlanir. Sem endranær hefur Sequences það að markmiði að vera vettvangur frumkvæðis, tilrauna og áræðni og stuðla að gerð nýrra verka og sýna framsækna myndlist.
Við þökkum það lán að búa hér við möguleika á svo öflugum stuðningi við margbreytilega og óháða menningarstarfsemi. Styrkveiting fór fram í Iðnó í gær og má hér líta yfir úthlutanir.
Undirbúningur fyrir tíundu Sequences hátíðina er nú í gangi og mun hún opna að hausti 2021.
21.10.19
Takk fyrir komuna á Sequences ix
Frá opnun Péturs Más Gunnarssonar á sýningunni Kíkir í Open, 2019
Sequences þakkar öllum hinum fjölmörgu gestum kærlega fyrir komuna á opnanir og dagskrárliði á þessari níundu útgáfu hátíðarinnar. Við þökkum listamönnunum mikið vel fyrir kúnstina og næringuna, frábært samstarf við þá fjölmörgu sem komu að hátíðinni með stóru og smáu. Við þökkum stuðningsaðilum hátíðarinnar, sér í lagi Reykjavíkurborg og Myndlistarsjóði. Síðast en ekki síst hugheilar þakkir til sýningarstjóranna góðu, Ingólfs Arnarssonar og Hildigunnar Birgisdóttur, sem mótuðu heildarmyndina af sínu mikla næmi, forvitni og visku. Þetta var gaman.
Eftirfarandi sýningar eru opnar áfram:
Ásmundarsalur, heiðurslistamaður Kristinn G. Harðarson, til 24.11
Harbinger, Ólöf Helga Helgadóttir, til 2. 11
Kling&Bang, sýning a), til 17.11
Nýlistasafnið, sýning b), til 24.11
La Primavera, eldri verk Kristins G. Harðarsonar, til 24.11
21.10.19
Guðný Guðmundsdóttir og Kristinn G. Harðarson héldu opna fyrirlestra í myndlistardeild Listaháskólans
Guðný Guðmundsdóttir sem sýnir nýtt verk í Sýningu b) í Nýlistasafninu og heiðurslistamaður Sequences ix, Kristinn Guðbrandur Harðarson, héldu hvort sinn fyrirlesturinn í opinni fyrirlestrarröð Myndlistardeildar Listaháskólans. Upptökur af fyrirlestrunum má finna á Vimeo, ásamt upptökum fjölda fyrirlestra í deildinni.
Guðný Guðmundsdóttir 18/10/2019 from Myndlistardeild LHI on Vimeo.
Kristinn G Harðarson 04/10/2019 from Myndlistardeild LHI on Vimeo.
18.10.19
Konfektmoli í lokin á Sequences ix; Eina kvikmynd Agnes Martin, Gabriel sýnd í Bíó Paradís
![]()
Agnes Martin, stilla úr Gabriel, birt með leyfi Pace Gallery.
Gabriel (1976), sem er eina kvikmyndin sem Agnes Martin gerði um ævina, er 78 mínútna löng, tekin upp í suðvesturhluta Bandaríkjanna (Nýju Mexíkó, Kaliforníu, Colorado) og fylgir eftir drengnum Gabriel á ferð í náttúrunni. Lokadagskrárliður Sequences ix er þessi konfektmoli Agnes Martin sem sýndur verður í Bíó Paradís síðdegis (kl. 18) á sunnudag. Á milli þess sem við horfum á piltinn á gangi eftir skógarstígum, fjalllendi og meðfram lækjarfarvegum beinist sjónarhornið að náttúrufyrirbærum en myndin hefur að geyma löng nærmyndaskot af blómum, trjám, vatni og eyðimerkursandi svo dæmi séu tekin. Gabriel er tekin á handhelda kvikmyndavél sem Martin stjórnar sjálf og vel má skynja persónulegt handbragð hennar í eilítið flöktandi kvikmyndatökunum. Ef undan eru skilin stutt brot úr Goldberg-tilbrigðum J. S. Bachs sem hljóma af og til, nokkrar mínútur í senn, er kvikmyndin þögul. Sjálf sagði Agnes Martin að Gabriel væri mynd um fegurð, sakleysi og alsælu sem eru lykilhugtök í höfundaverki listakonunnar.
Miðar eru fáanlegir á tix.is og við innganginn.